Министерот за одбрана Талат Џафери, денес (30-ти септември 2013 година) во спортската сала „Расадник“ во Скопје свечено го отвори меѓународниот „5-ти Футсал Куп за мир“ кој ќе се одржува од денес до 2-ри октомври 2013 година. Футсал Купот за мир се организира под покровителство на Меѓународниот Совет за воени спортови (МСВС), а покрај екипата на Армијата на Република Македонија како домаќин, учествуваат екипите за футсал од армиите на: Словенија, Хрватска, Босна и Херцеговина, Србија и Црна Гора. На свеченото отварање на Петтиот Футсал Куп за мир, покрај министерот за одбрана, присуствуваа: началникот на ГШ на АРМ генерал-потполковник Горанчо Котески, високи претставници на МСВС, претставници од армиите на земјите-учеснички, Фудбалската Федерација на Македонија, воените аташеи акредитирани во Република Македонија и други гости и љубители на спортот.
Во обраќањето пред учесниците на купот, министерот Џафери истакнувајќи го значењето на ова натпреварување како начин за зближување на народите и нациите, искажа уверување дека Министерството за одбрана и АРМ ќе ги следат сите чекори во одржувањето, негувањето и унапредувањето на спортот, со заложба за развивање на „Пријателството низ спортот“ како мото на МСВС. Началникот на ГШ на АРМ генерал-потполковник Горанчо Котески во поздравното обраќање на учесниците на купот им порача дека со ова натпреварување тие покажуваат дека спортот во армиите ширум светот, претставува значаен сегмент во обуката, но и алатка за развивање на пријателството, другарството и зближување на народите од различни краеви.
Ова натпреварување во футсал помеѓу армиите од регионот е петто по ред, а иницијативата за негово одржување за прв пат е покрената на четвртите Воени олимписки игри во Индија во 2007 година, во рамките на семинарот „Спорт за мир“. Првиот „Футсал куп за мир“ е одржан во 2009 година, кога домаќин беше Војската на Србија, а останатите вакви натпреварувања се одржаа во Хрватска (2010), Словенија (2011) и во Црна Гора (2012).
Претпладнево турнирот беше отворен со натпреварот помеѓу екипите на армиите на Србија и Црна Гора, после што следи натпреварот помеѓу Хрватска и Босна и Херцеговина. Попладнево во 15.00 часот на програмата е натпреварот помеѓу Македонија и Црна Гора, а во 16.00 часот се игра натпреварот помеѓу Хрватска и Словенија. Утре, во 09.00 часот се среќаваат Македонија и Хрватска, а веднаш после тоа е натпреварот помеѓу Словенија и Босна и Херцеговина. Во среда претпладне се предвидени полуфиналните наптпревари, а попладнето ќе се игра финалето и натпреварот за трето место.
