На 25.10.2024 година заврши 4-неделниот Курс за обновување на знаењето на англискиот јазик (КОЗАЈ 2-24), кој се одржа во просториите на Центарот за странски јазици (ЦСЈ), Команда за обука и доктрини, во касарната „Илинден“ – Скопје. Курсот е креиран од страна на тимот на ЦСЈ, а го реализираа четири професорки од ЦСЈ со долгогодишно искуство во држење настава по англиски јазик и со посебна професионална обука за креирање наставни материјали и специјализирани курсеви.
КОЗАЈ 2-24 е специјализиран курс чија основна цел е обновување на знаењето на англискиот јазик, во поширокиот контекст на наставната програма од редовниот курс за ниво 2 во ЦСЈ. Курсот им овозможува на слушателите кои го учеле англискиот јазик, но активно не го употребувале на своите работни места, да го обноват и надградат своето знаење. Курсот опфати низа различни теми поврзани со современото живеење, посебен функционален јазик потребен за комуникација, задачи за пишување и соодветни граматички содржини. Проверката на знаењето, на крајот на курсот, се изврши со одржување презентации преку кои слушателите успешно го демонстрираа знаењето стекнато во текот на курсот. На крајот од курсот, слушателите добија сертификати за успешно завршен курс.
