Во рамки на посетата на Армијата од страна на делегација од ЕУ, заменикот на началникот на Генералштабот на Армијата, генерал-мајор Азим Нуредин, денес оствари работна средба со одбранбеното аташе на ЕУ, полковник Пијетро Мостарди.
За време на средбата се разговараше за соработката на Армијата со Европската Унија, со акцент на досегашните и претстојните донации од страна на ЕУ, во насока на градење на капацитетите и способностите на Армијата. Воедно, се разговараше и за учеството на Армијата во мисијата на ЕУ/АЛТЕА во Босна и Херцеговина, како и можностите за стручно оспособување и усовршување на припадниците на Армијата во центрите за обука и школување поддржани од ЕУ.
Во текот на денешниот ден во Генералштабот на Армијата, одбранбеното аташе на ЕУ, полковник Пијетро Мостарди одржа предавање на тема „Безбедносна и одбранбена политика на ЕУ, Воен штаб и Воен комитет на ЕУ и моментални операции и мисии предводени од ЕУ”.
Во наредните денови одбранбеното аташе на ЕУ ќе ги посети Балканските медицински наменски сили во касарната „Илинден“ и инженерискиот баталјон во „Чојлија“.
