Началникот на генералштабот на Армијата, генерал-потполковник Васко Ѓурчиновски заедно со клучниот раководен персонал од Генералштабот, преку реферирање од страна на командантите на првопотчинетите команди и единици се запознаа со подготвеноста и статусот на командите и единиците во текот на 2019 година.
На годишното реферирање во касарната „Илинден“ кое согласно Планот за работа на Генералштабот се реализира на крајот од тековната година, потчинетите команданти пред Началникот го презентираа обемот на реализираните активности, обуката, опременоста и нивното влијание врз борбената готовност.
На реферирањето од страна на командантите се опфатија состојбите во персоналниот менаџмент, заштита на силите, операциите, обуката и вежбите, логистичкото обезбедување, врските комуникациите, буџетирањето и цивилно-воените односи. Притоа се претставени исполнување на планираните задачи, постигнатите резултати во обуката и ангажирањата, условите за живот и работа, како и научените лекции од мировните мисии.
Од страна на Началникот на генералштабот, на крајот од реферирањето заедно со заклучокот за презентираните состојби се дадени насоки за планираните активности во следната 2020 година, пред се во однос на процесите на трансформација и обврските за потполна интеграција во структурите на НАТО по нашето скорешно полноправно членство.
