Денес 06.03.2015 година во касарната „Алексо Демниевски-Бауман”, Велес се реализира воена свеченост по повод давањето заклетва на војниците на доброволно служење на воениот рок од генерацијата „Февруари“ 2015 година.
Заклетва дадоа 165 војници меѓу кои 12 припаднички од понежниот пол. Ова е дваесет и петта генерација војници кои доброволно го служат воениот рок.
На свеченоста по повод заклетвата присуствуваа Министерот за одбрана на РМ г-дин Зоран Јолевски, Заменикот на НГШ на АРМ генерал-потполковник Насер Сејдини, бригадниот генерал Мухамед Рацај, претставници од единиците на АРМ, претставници од локалната самоуправа, роднини на војниците и други гости.
Министерот за одбрана на РМ г-дин Зоран Јолевски на војниците им ја честита дадената заклетва посакувајќи им успех во наредните три месеци во редовите на АРМ. Воената професија е предизвик, чест и гордост за сите амбициозни млади луѓе, вашата мисија е да научите што повеќе од тајните на воената вештина, истакна министерот во својот говор. Тој истакна дека досега низ Центарот за индивидуална обука поминале над 4 000 војници и дека многу од нив ја имаат одбрано војничката професија за служба во Армијата на Република Македонија.
Командантот на Команда за обука и доктрини полковник Љупчо Костовски на војниците во својот говор им порача дека во наредниот период им претстои напорна работа во совладувањето на планираните содржини од обуката. Стекнатите знаења и трудот понатаму ќе бидат вреднувани, тоа ќе биде еден од елементите за оние кои сакаат во иднина да ја изберат војничката професија.
