Македонските мировници, припадници на МАККОН-10 во мисија „Одлучна поддршка“ во Кабул, Авганистан, свечено и достоинствено го одбележаа Денот на независноста „8ми Септември“.
Во свечена атмосфера, со колорит и торта украсена со боевите на Македонското знаме, беше организиран заеднички ручек на нашите мировници на кој присуствуваа припадници на командата на ТААC-C, предводени од командантот, бригадниот генерал Јашар Дилбер.
Свеченото одбележување на празникот продолжи и во вечерните часови со пригодна свеченост на која присуствуваа шеесетина гости, припадници од различни контингенти кои учествуваат во мисијата, сместени во базата на меѓународниот аеродром Хамид Kарзаи во Кабул.
По тој повод пригодно обраќање имаше Најстариот национален претставник на МАККОН-10, полковник Ѓорѓи Митриновски.
„Чествувајќи го Денот на независноста, цврсто верувам дека нашиот контингент ќе биде првиот кој ќе ја претставува Република Северна Македонија во мисијата „Одлучна поддршка“ како 30-та полноправна членка на НАТО“, истакна меѓу другото полковникот Митриновски.
Свеченоста беше збогатена со церемонија на која бригадниот генерал Јашар Дилбер на припадниците на македонскиот контингент им додели НАТО-медали за учество во мисијата, по што имаше и пригодно обраќање.
Во таа пригода, а по повод неговото скорешно завршување на мисијата, од името на македонскиот контингент, Најстариот национален претставник полковник Ѓорѓи Митриновски му врачи пригодна плакета.
Во рамките на свеченоста, мајорот Александар Стојков одржа презентација на која на автентичен начин им ги делови убавините на нашата земја со цел позитивна провокација на присутните да ја посетат и да се уверат во она што им беше презентирано.
Свеченоста беше заокружена со заеднички коктел, а на присутните им беа поделени и соодветни подароци со симболите на МАККОН-10 и на нашата земја.
