Денес, во касарната „Чојлија“ во Петровец, се реализираше посета на инженерискиот баталјон (инжб) од составот на 1.пешадиска бригада (1.пбр), од страна на воениот советник на Европската Унија (ЕУ), полковник Алеш Минарик, придржуван од политичкиот советник при мисијата на ЕУ во Република Северна Македонија, господин Христо Тончев.
Гостите беа пречекани од страна на заменик-командантот на 1.пбр, полковник Стеван Наумоски, командантот на инжб потполковник Ласте Ѓоргиев и клучниот персонал од инжб.
За време на посетата се реализираше брифинг за инжб за приоритетите и задачите кои треба да ги достигне единицата, а посебен акцент беше даден на опременоста и подготвеноста на инжб за декалираниот вод во составот на Лесната пешадиска борбена група (ЛПБГ).
Како дел од посетата беа презентирани новопримените инженериски машини: дозер LIEBHERR и комбинирана инженериска машина HIDROMEK, набавени преку Европскиот мировен фонд (ЕМФ).
Гостите изразија посебно задоволство и благодарност за денешната посета во инжб, а полковник Алеш Минарик нагласи дека дополнително ќе се ангажира за забрзување на процесот за набавка на преостанатата опрема наменета за инжб, која треба да биде набавена од ЕМФ во наредниот период.
Мерката за помош од ЕМФ ќе ги зајакне капацитетите на инжб и Армијата за учество во операциите и мисиите во рамки на заедничката безбедносна и одбранбена политика на ЕУ и другите меѓународни мисии во наредниот период.
Одобрувањето на помош во рамки на Европскиот мировен фонд (ЕПФ), наменето за опремување и модернизација на Армијата, во контекст на достигнување на зацртаните цели на способности, ќе продолжи согласно ДПРОС 2023-2032.
ГЃ/ДЧ
