Со скромна воена свеченост во НАТО базата во Летонија се изврши примопредавање на должноста помеѓу командирот на АБХО одделението, наредник Сашо Десподовски и постар водник 1 класа Димитар Јанев, командир на артилериското одделение кое отпочнува со извршување на задачите во склоп на операцијата на НАТО- „Зајакнато истурено присуство“ (Enhanced Forward Presence).
На свеченоста присуствуваа командантот на механизирана пешадиска бригада на Копнените Сили на Летонија, полковник Сандрис Гаугерс, командантот на НАТО борбената група и националните претставници на НАТО земјите во базата.
Наредникот, Сашо Десподовски го истакна искуството кое е стекнато во здружените сили на НАТО Алијансата во Летонија и дека е чест да се претставува државата во состав на меѓународни сили.
Постариот водник, Јанев ја истакна дадената доверба и подготвеноста на нашиот контингент да продолжи со голема посветеност да ги извршува задачите и предизвиците заедно со сите други членки на НАТО, со цел зачувување на мирот и стабилноста на овој дел од Европа.
Пред присутните се обрати и полковникот Сандрис Гаугерс кој им се заблагодари на претставниците на Армијата на Република Северна Македонија за нивната посветеност и професионализам во извршувањето на задачите и предизвиците со кои се соочуваа во меѓународните операции и беа доделени стимулативни мерки на дел од персоналот.
Свеченоста заврши со свечен чин на примопредавање на државното знаме.
