Во касарната „Кузман Јосифовски-Питу“ во Тетово, со воена свеченост и предавање на военото знаме се изврши примопредавање на должноста командант на Третиот пешадиски баталјон (3.пб) од составот на Првата пешадиска бригада (1.пбр).
На денешната свеченост присуствуваа командантот на Командата за операции бригаден генерал Мирче Ѓоргоски, командантот на 1.пбр бригаден генерал Дејан Чиплаковски, началниците на секции од Командата за операции, командата и штабот на 1.пбр, команданти на единиците од составот на бригадата, поранешни команданти и останати гости.
Должноста командант на 3.пб од потполковник Томица Ристоски ја прими мајор Миле Станоевски, кој досега извршуваше должност во извидувачко- разузнавачиот баталјон.
На свеченоста, командантот на 1.пбр, бригаден генерал Дејан Чиплаковски меѓу другото истакна: „Да се застане на чело на ваква единица со припадници кои се високо мотивирани, професионални, обучени и компетентни, потребен е командант којшто поседува исклучителни лидерски вештини и способности. Да се биде командант е голема обврска, но и императив да се остане доследен во исполнувањето на вредностите како што се: храброст, чест и лидерство кои ги красат припадниците на 1.пешадиска бригада“.
Досегашниот командант, потполковник Ристоски се заблагодари на персоналот од единицата за укажаната поддршка во текот на неговото извршување на должноста, додека новопоставениот командант, мајорот Станоевски истакна дека крајно совесно и одговорно ќе командува со единицата и се заблагодари за довербата која му е дадена за извршување на должноста.
Од припадниците на баталјонот на досегашниот командант му беше врачена плакета со логото на единицата.
ГЃ/ДЧ
