По пристигнувањето на армискиот полигон „Криволак“ на првиот транспорт со дел од припадници, инженериски средства и материјално-техничка опрема на 15.инженериски баталјон на воените сили на САД стационирани во Европа (15.инжб/ВС на САД), на ден 21.03.2021 година започнаа заедничките активности и обука како дел од подготовките и уредување на капацитетите за успешно реализирање на вежбата „Одлучен удар 21 “.
Заедничката обука на припадниците од инженерискиот баталјон (инжб) од Командата за операции и на 15.инжб/ВС на САД има за цел двете инженериски единици преку заеднички активности да ги доградуваат и доуредуваат сообраќајниците на АП Криволак, градат објекти за вежби и обука, магацини, стрелишта, полетно-слетна писта за беспилотни летала и друго.
Реализацијата на сите планирани активности во предвидениот рок претставува голем предизвик, но со оглед на заедничката долгогодишна соработка на овие две инженериски единици можеме да сметаме на квалитетна и навремена реализација на задачите.
Активностите ќе траат до 15.05.2021 година и се со цел на взаемна обука и воедно создавање на оптимални услови за реализација на вежбата „Одлучен удар 21“. Покрај тоа, со оваа активност уште повеќе ќе се осовременат капацитетите и инфраструктурата на АП Криволак кој по нашето полноправно членство во НАТО прераснува во современ воен тренинг центар, со уникатни услови за изведување на воени вежбовни активности.
