Денес, 28-ми декември (сабота), во организација на припадниците на воздухопловниот ВИНГ (вВИНГ), на воениот дел од Меѓународниот аеродром Скопје во касарната „НХ Страшо Пинџур“ во Петровец, се одржа церемонија за поделба на новогодишни пакетчиња на децата на вработените во вВИНГ како и од останатите команди и единици на Армијата и МО. Воено МО овозможи поделба на пакетчиња и за децата од домовите за деца без родители „11–ти Октомври“ и „25–ти Мај“.
Традиционално и оваа година со транспортен хеликоптер на Армијата пристигна и подели новогодишни пакетчиња најомилениот новогодишен лик кај најмладите – Дедо Мраз.
На оваа традиционална церемонија присутвуваа над 400 деца кои имаа единствена можност да го проследат симболичното пристигнување на Дедо Мраз со транспортен воен хеликоптер, после што во просториите на вВИНГ им беа доделени новогодишните пакетчиња. Активноста беше збогатена со културно уметничка програма, настап на студиото а ритмички танци „Денс студио Мак“ од Куманово и кутурно уметникото друштво „Гоце Марковски“ од Скопје. Оваа манифестација традиционално се одржува повеќе од 20 години во пресрет на новогодишните и божиќните празници, а заради атрактивноста и годинава побуди огромен интерес кај најмладите.
