Со денешната церемонија на свечено затварање на армискиот полигон „Криволак“ официјално се означи завршетокот на досега најголемата воена вежба реализирана во Република Северна Македонија – „Одлучен Удар 19“.
Пред стројот на учесниците на вежбата денес се обратија командантот на Здружената оперативна команда, која е организатор и реализатор на вежбата, генерал-мајор Павле Арсоски и директорот на вежбата, потполковник Игор Манасовски.
Во своето обраќање со кое официјално ја прогласи вежбата за затворена, генералот Арсоски оддавајќи признание на учесниците на вежбата за вложениот труд, напори и ентузијазам, истакна „Повеќе од сигурен сум дека времето поминато во обука го искористите во споделување на веќе стекнатите искуства и вештини и дека од оваа вежба заминувате побогати за едно ново искуство“.
Директорот на вежбата кажа дека претставува особена чест да се биде дел од оваа вежба, на која сите кои учествуваа се побогати со нови стекнати знаења и искуства, но и стекнати пријателства кои по којзнае кој пат потврдуваат дека придобивките и предизвиците се исти без разлика на обележјата на униформите, бидејќи сите делат иста цел.
На денешната церемонија присуствуваа и заменик на командантот на ЗОК, бригаден генерал Орце Јордев и командантот на првата механизирана бригада од чиј состав беа најголемиот број учесници, полковник Драган Ковачки.
На вежбата „Одлучен удар“ која е организирана од страна на нашата армија, учествуваа повеќе од 2700 припадници на вооружени сили на шест држави: Република Северна Македонија со копнени, воздухопловни и специјални сили, Соединетите Американски Држави (Национална гарда на Пенсилванија, 19 група за Специјални операции и Воздухопловни сили на САД), Литванија и Црна Гора со артилериски капацитети и специјални сили на Бугарија и Албанија.
Во периодот од 5 јуни до денес, на армискиот полигон „Криволак“, согласно сценариото се реализираа 26 настани, на кои се извршија 96 задачи. На вежбата беа реализирани и 13 тактички вежби со боеви гаѓања, но исто така во рамките на цивилно воената соработка беа спроведени презентации на опремата и вооружувањето кои се користеа во вежбата низ осум градови во државата.
Во текот на вежбата се вршеше постојана контрола на животната средина. Резимето на двете истражувања покажа дека нема предизвикано никакви штетни последици по здравјето на луѓето и по природата.
Вежбата во потполност ја постигна својата цел за зајакнување на стандардните оперативни процедури на единиците, подобрување на интероперабилноста и унапредување на заемното разбирање и доверба и зајакнување на меѓусебната соработка.
