Со одржаниот состанок во Генералштабот (ГШ) помеѓу началникот на ГШ, генерал-потполковник Васко Ѓурчиновски и командантот на мултинационалната бригада на Југоисточна Европа (СЕЕБРИГ), бригаден генерал Аристедеис Илиопулос, на кој присуствуваа и началниците на секциите за операции и обука од ГШ на Армијата и припадници на штабот на СЕЕБРИГ, отпочна дводневната евалуациска обиколка на единиците на Армијата на Република Северна Македонија кои се декларирани состави во оваа бригада.
Во првиот ден од обиколката се реализираше посета на декларираниот инженериски вод од составот на инженерискиот баталјон (инжб) при Командата за операции (КО), на армискиот полигон „Криволак“, каде веќе подолг период се ангажирани поголемиот дел од командата, штабот и потчинетите единици на инжб.
Претставниците од штабот на СЕЕБРИГ беа запознаени со мисијата на единицата, структурата и капацитетите на единицата и на декларираниот инженериски вод. Претставниците од штабот на СЕЕБРИГ потоа извршија евалуациска инспекција на водот, по што следеше вежба во реални услови на патниот правец с.Мушанци – с.Енешево на тема: „Поправка на оштетена делница на пат“.
Во текот на денешниот ден, согласно Планот за обиколка се реализираше посета на Командата за операции и тимот беше примен од страна на командантот на КО, генерал-мајор Павле Арсоски, а во текот на денот се спроведе инспекција на декларираната пешадиска чета од вториот пешадиски баталјон и беа презентирани способностите на единицата на тема: „ Воени операции во урбана средина со ослободување на заложник“.
Во составот на СЕЕБРИГ, Армијата на Република Северна Македонија учествува со една пешадиска чета и еден вод од инжб од самото негово формирање и досега има учествувано на следните вежби во земјата и во странство: „Corner Stone 2000“ на АП „Криволак“, Р. Македонија; „Corner Stone 2002“ во Пловдив, Р. Бугарија; „Corner Stone 2003“ во Констанца, Р. Романија и „Adriatic Phiblex 2004“ на Слуљ, Р. Хрватска. Локацијата на Командата на СЕЕБРИГ функционира по принцип на ротација и од 26.08.2020 година таа се наоѓа во касарната „Боро Менков“ во Куманово. Во нејзината мултинационална мировна мисија, покрај нашата држава, учествуваат Р. Турција, Р. Грција, Р. Бугарија, Р. Албанија и Р. Романија.
