Припадниците на АРМ се активно вклучени во расчистувањето на теренот по катастрофалната поплава што викендов го зафати скопскиот регион. Војниците помагаат при расчистување на дворовите, улиците, како и при доставувањето на неопходните работи до најпогодените подрачја.
Во справување со последиците предизвикани од невремето АРМ постојано е на терен во најпогодените подрачја припадниците на АРМ во континуитет се ставени на располагање во помош на погоденото население од поплавите, на сите места каде за тоа се јавува потреба.
Во функција е ставен тактичко оперативниот центар на АРМ, кој воедно е координативен центар низ кој се координираат сите активности за ангажирање на потребните средства и персонал согласно изразените барања, како и меѓусебна координација помеѓу инволвираните субјекти ангажирани во санирањето на последиците од катастрофалната поплава.
Од страна на воената полиција во содејство со МВР се регулира и сообраќајот во реонот на Стајковци. Исто така, активно се помага во регулирање на движењето на механизацијата и моторните возила ангажирани во отстранување на последиците од поплавите.
Во меѓувреме пристигна и конвој од КФОР со инженериски машини наменети за помош во настраданите подрачја. Механизацијата, во координација со припадниците на АРМ активно се вклучи во расчистување на улиците од наносите од поплавата. Инженериските машини се доделени од страна на КФОР врз основа на меѓусебната соработка и искажаните потреби од страна на АРМ.
Припадниците на АРМ од единиците на АБХО започнаа со дезинфекција по куќите и дворовите со цел превентивно делување во спречување на појава на заразни заболувања.
Припадничките на АРМ од понежниот пол, рамноправно работат на терен во расчистувањето на наносите од кал и отпад од куќите и дворовите, регулирање на сообраќајот, исцрпување на вода, дезинфекција на просторот и на сите останати активности.
Исто така во тетовскиот реон кој беше зафатен од невремето е ангажиран тим на Армијата на Република Македонија со задача да ја отстрани карпата што е надвисната над тетовско село Шипковица.
