Денес во касарната „Илинден“ – Скопје со воена свеченост се изврши примопредавање на должноста командант на 3.логистички баталјон (3.логб) од бригадата за логистичка поддршка (брЛП), помеѓу потполковник Фето Бајрами како предавач и мајор Билјана Николовска како примач на должноста во присуство на командантот на брЛП, полковник Цветко Јаневски, командантите на потчинетите единици на брЛП и други гости.
Во говорот пред присутните гости командантот на брЛП, полковник Цветко Јаневски изрази благодарност на потполковник Фето Бајрами за вложените знаење, труд, способности и време во реализацијата на задачите, на новиот командант и посака многу успех при извршување на должноста и надградување и надминување на нејзиниот претходник.
Досегашниот командант на 3.логб, потполковникот Фето Бајрами му се заблагодари на полковник Цветко Јаневски за поддршката и водењето во работата, а на мајор Николовска и посака здравје и многу успех на новата должност.
Новопоставениот командант мајор Николовска се заблагодари на укажаната доверба за поставување на должноста командант, но и одговорност да командува со 3.логистички баталјон. Мајор Николовска истакна: Дека силата не е во поединецот, туку во тимот. Клучот на успехот е во тимската работа. Затоа Ве повикувам и Ве охрабрувам, заедно да го дадеме својот максимум, да бидеме постојано посветени на извршување на задачите, заеднички да ги совладаме сите предизвици кои доаѓаат.
На крајот од свеченоста, на церемонијален начин се изврши свечено примопредавање на военото знаме на единицата, со што се изврши и примопредавање на должноста Командант на 3.логистички баталјон.
ЗВ/ЛС/ЧС/ИМ
