Врз основа на потребата на специјалните сили на Армијата на Република Северна Македонија за користење на специфични полигони за обука и вежби, како и меѓусебната соработка со специјалните сили од министерството за внатрешни работи кои се стационирани во касарната „Илинден“ беше инициран заедничкиот проект за оспособување на модерно стрелиште за гаѓање за потребите на овие единици.
Како резултат на потпишаниот меморандум за соработка помеѓу министерството за внатрешни работи и министерството за одбрана како заеднички интерес, денес во присуство на министерката за одбрана, Радмила Шекеринска, министерот за внатрешни работи Оливер Спасовски, началникот на генералштабот, генерал-потполковник Васко Ѓурчиновски официјално се пушти во употреба заедничкото стрелиште на специјалните сили на Армијата и МВР.
Стрелиштето за пиштол и автомат ќе го користат припадниците на единицата за специјални задачи и специјалните единици на Армијата на Република Северна Македонија и претставува дел од полигонот за урбана борба во касарната, во чиј состав влегуваат и тнр населено место и куќата за гаѓање.
Согласно потребите и можностите дефинирани во балистичката проценка, стрелиштето е наменето за изведување на подготвителни, инстиктивни и ситуациони гаѓања, како основа за огнената обука на персоналот на овие единици со пружање на најприближни услови на реална борбена ситуација.
Краен продукт на овој проект ќе биде зголемување на квалитетот на обуката во гаѓање и почесто вежбање на персоналот при што значително ќе се подигне нивото на подготвеност, а ќе се заштедат време и ресурси за реализација на гаѓања кои до сега се извршуваа на останатите стрелишта.
Воедно стрелиштето ќе претставува капацитет, наменет и за специјална обука при меѓународна соработка со партнерски држави и членки на НАТО.
За време на денешната церемонија на отпочнување со работа на стрелиштето од страна на припадниците на баталјонот на специјални сили на Армијата Единицата за специјални задачи при Министерството за внатрешни работи се изведоа три показни вежби на ситуациони боеви гаѓања.
