Во Центарот за симулации во касарната „Алексо Демниевски – Бауман“ во Велес, штабот на SEEBRIG во период од 2 до 11 април 2025 година ќе реализира симулaциска вежба на командно место „SEVEN STARS 2025”. Согласно планот за организација и учество на вежби од меѓународен карактер, со целосна поддршка од Армијата на Република Северна Македонија, вклучувајќи ја и Командата за обука и доктрини со своите капацитети, се реализира симулациска вежба каде учествуваат повеќе од 150 припадници на земјите членки на SEEBRIG, како и лица набљудувачи од НАТО.
Преку компјутерски симулирана вежба во Центарот за симулации ќе се прикаже интероперабилноста, а воедно и ќе се извежбуваат процедури за командување и контрола во рамките на штабот на SEEBRIG, вклучувајќи ги и ќелиите за одговор прикажани од страна на единиците поврзани со SEEBRIG. На денот на високи гости, на армискиот полигон „Криволак“, ќе се реализира динамична демонстрација на активности на тактичко ниво од страна на придружната единица на SEEBRIG од составот на Армијата на земјата домаќин.
Оваа вежба од меѓународен карактер има за цел подобрување на оперативните способности на Командата на бригадата и придодадените единици во состав на бригадата, а со тоа и подобрување на интероперабилноста при учество во операции за поддршка на мирот, хуманитарни асистенции и операции за одговор при катастрофи.
Со вежбата „SEVEN STARS 2025”се зајакнуваат способностите на SEEBRIG за соработка и стабилност во Југоисточна Европа и воедно се демонстрира подготвеноста за учество во операции за поддршка на мирот во случај на барање на Обединетите нации и ОБСЕ.
