Со воена свеченост во касарната „Илинден”, денес, се изврши примопредавање на должноста командант на Баталјонот за поддршка на Генералштабот и Гарнизон Скопје (бпГШ и ГС) помеѓу потполковник Гоце Јорданов и потполковник Меџаит Мемеди.
Командантот на Логистичката база, полковник Мухарем Мухареми, на почетокот на своето обраќање го истакна значењето на Баталјонот за поддршка на ГШ и ГС, кој врши логистичка поддршка на најголем број на единици и команди на Армијата во својата зона на одговорност. Командантот му изрази благодарност на потполковник Гоце Јорданов за вложените труд, енергија и време во реализацијата на задачите, како и за навременото испорачување на логистичката поддршка во потребните количини. Полковник Мухареми им оддаде признание на припадниците на бпГШ и ГС за досегашниот ангажман во реализацијата на задачите и побара поддршка за новиот командант во идното функционирање на воениот колектив.
Досегашниот командант, потполковник Гоце Јорданов истакна дека во изминатите 18 месеци, извршувајќи ја должноста во време на глобалната пандемија, се сретнал со бројни предизвици при што му се заблагодари на полковник Мухарем Мухареми за дадената поддршка во реализирањето на задачите, а на новиот командант му посака успех во извршувањето на доделените задачи, добро здравје и успех на професионален план.
Новопоставениот командант, потполковник Меџаит Мемеди, се заблагодари на укажаната доверба и истакна дека во наредниот период ќе продолжи со извршување на задачите и совладување на сите предизвици кои ќе се појават. На вработените и присутните на свеченоста, пполк Мемеди им посака многу здравје и успех на личен и професионален план.
На крајот од свеченоста, на церемонијален начин се изврши свечено примопредавање на военото знаме на единицата, со што се изврши и примопредавање на должноста командант на бпГШ и ГС.
На денешната свеченост, присуствуваа началникот на Ј-4 во Генералштабот на Армијата, полковник Васко Тошевски, како и командантите на првопотчинетите единици и единиците во касарната „Илинден“ – Скопје.
ЗВ/ММ
