Согласно годишниот план календар за обука на АРМ за 2016 година во период од 15.06. до 06.07.2016 година на АП Криволак се реализираше стационарно логорување со питомците од прва и втора година од Центарот за обука на питомци (ЦОП).
Практичната настава со питомците има за цел оспособување и усовршување во тактичките работи и постапки на ниво поединец/тим и одделение/вод.
За време на оваа обука успешно беа реализирани два тактичко кондициони марша на релации од по 25 километри, питомците имаа можност да се обучат за движење по непознат терен со користење на карта, рачна бусола и со современи средства за навигација, а дополнително во рамки на наставата се реализираа подготвителни и единечни гаѓања со пешадиско вооружување. За крај на обуката се реализира командирско гаѓање со пешадиско – стрелачко одделение.
Со реализација на практичната настава питомците имаа можност во целост да ги надградат и утврдат веќе стекнатите теоретски знаења и да се стекнат со самодоверба и искуство за живот и работа во теренски услови неопходни за секој иден, современ и добро обучен офицер на Армијата на Република Македонија.
