Мисија на Баталјонот на Воена полиција:
Баталјонот на Воена полиција (бВП) е наменет за изведување на воено-полициски задачи на целата територија на Република Северна Македонија и НАТО водени операции, преку спроведување на широк спектар на воено-полициски функции, поддршка на МВР и останатите владини и невладини институции, како и извршување на активности поврзани со попречување, испитување и откривање на кривични дела во одбраната, согласно Законот за кривична постапка.
Листа на суштински задачи на бВП
- Поддршка на мобилноста на трупите:
- Извидување на правци и зони на движење;
- Контрола и регулирање на сообраќајот;
- Контрола на движењето;
- Сообраќајно обезбедување на конвои кои транзитираат низ државата и во НАТО предводени операции.
- Операции за обезбедување:
- Обезбедување на области и лица, физичка (техничка);
- Справување со толпа и нарушен јавен ред и мир;
- Обезбедување на конвои и транспорт на класи на снабдување низ државата и во НАТО предводени операции;
- Лична заштита;
- Сајбер-безбедност;
- Безбедност на информации.
- Постапки со заробеници и привремено задржан персонал:
- Планирање притвор;
- Активности за приведување и задржување;
- Привремено задржан персонал.
- Полициски задачи – Операции за спроведување на законот и редот:
- Спроведување на законот;
- Будност и спречување на пристап/затворање;
- Поддршка на истрагата;
- Увид на лице место и известување;
- Истрага за воени злосторства и прекршување на меѓународни закони;
- Криминалистичко разузнавање;
- Дополнителни воено-полициски способности – царина и употреба на службени воени кучиња.
- Операции за стабилизација:
- Реконструкција и стабилизација;
- Активности при операции за стабилизација.
Потполковник Зоран Станкоски
Потполковник Зоран Станкоски е роден 1981 година во Скопје. По завршувањето на основното и средното образование во Скопје, продолжува со воено образование на Воената академија „Генерал Михајло Апостолски“ во Скопје.
По завршувањето на високото воено образование во 2004 година (X-класа), својата воена кариера ја започнува како командир на вод во полк за врски, за кратко потоа да премине во Прв механизиран пешадиски баталјон во Прва механизирана пешадиска бригада како командир на вод сè до 2010 година, а од 2010 година па сè до денес извршува должности во Баталјонот на Воена полиција. Имено со доаѓањето во Баталјонот на Воена полиција започнува како командир на вод за техничка заштита и обезбедување сè до 2014 година, кога го презема командувањето со втората чета на Воена полиција. За време на извршувањето на должноста командир на чета, беше и командир на декларирана чета на Воена полиција, која согласно стандардите на НАТО беше оценета со сертификат „NEL-2“ (combat ready). Во 2017 година прима должност началник на секцијата С-1 во бВП и истата ја извршува сè до 2019 година кога прима должност началник на секцијата С-3/7 во бВП. Должноста началник на штаб и заменик на командантот ја извршува во периодот од 2022 до денешен ден.
Военото образование го продолжува на Командно-штабната академија при Универзитетот на Маринскиот Корпус во Квантико, САД во период 2019-2021 година.
Военото образование го надоградува и со завршени повеќе курсеви во земјата и странство, како што се: Курс за контра импровизирани експлозивни направи во Р. Украина во 2008 година; Курс за инструктори за несмртоносно оружје во САД во 2011 година; Интернационален курс за штабни офицери во Р. Словачка во 2014 година; Курс за градење на интегритет во операции за поддршка на мирот во Сараево, БиХ во 2018 година; Курс за оценувачи на декларирани единици согласно „OCC E&F“ и согласно „CREVAL“ во 2016 и 2023 година и многу други.
Во период од 2008/2009 и 2014 година учествувал во мировната операција во ИР Авганистан, а исто така учествувал и на повеќе вежби во земјата и странство, како што се: „Кооперативно здружување 2005“; серијал вежби „Македонски Блесок“ почнувајќи од „Македонски Блесок 03“; „NATO Georgia Exercise 2016“ во Грузија; „Здружена Реакција 17“; „Platinum Wolf-17“ во Р. Србија; „Saber Strike 18“ во Р. Полска; „Rapid Trident 19“ во Р. Украина; „Beyond Horizon 22“ во Р. Бугарија,
„Subject Matter Expert – SME“ за воена полиција, Оценувач на декларирани капацитети согласно концептот „OCC E&F“ и „CREVAL“, инструктор за несмртоносно оружје и воедно член на работната група за стандардизација при Воено-полициската заедница во НАТО центарот за извонредност „MP COE“.
За постигнатите резултати во досегашната работа повеќе пати добивал пофалници, награди и признанија меѓу кои: пофалници од НГШ на Армијата, командантот на КО, наградно отсуство од МО, НГШ на Армијата, командантот на КО и медал за учество во мировната операција „ISAF“ ИР Авганистан и сл.
Активно го познава и користи Англискиот јазик согласно СТАНАГ 6001 и Германскиот јазик (разговорно). Татко на едно дете.
Претходни должности:
Командир на вод во полк за врски, 2004-2007 година;
Командир на механизиран пешадиски вод, 2007-2010 година;
Командир на вод за техничка заштита и обезбедување, 2010-2014 година;
Командир на 2.чВП, 2014 -2017 година;
Началник на С-1, 2017-2019 година;
Началник на С-3/7, 2019-2022 година;
Началник на штаб и заменик на командант, 2022-2024 година;
Унапредувања:
Потпоручник 2004-2008 година;
Поручник 2008-2012 година;
Капетан 2012-2017 година;
Мајор 2017-2023 година;
Потполковник од 2023 година.
Баталјонот на Воена полиција повлекува корени од богатото македонско историско минато, поточно со традиција од 29 октомври 1878 година, кога во текот на Македонското (Кресненското) востание, каде било издадена наредба за формирање на воено-полициски начелства на ослободената територија на Македонија, кои всушност претставуваат први воено-полициски сили.
Затоа и 29 октомври, како значаен историски настан, единицата го одбележува како свој „Ден на единица“.
Баталјонот на Воена полиција, како единствена воено-полициска единица во Армијата, постои и функционира од самото формирање на Армијата на Република Македонија, поточно од 15 април 1992 година, кога единицата е формирана со указ на претседателот на Република Македонија и извесен период функционирала како самостојна единица на АРМ.
Од самото формирање до денес формациската структура се менувала повеќе пати па затоа денес Баталјонот на Воена полиција, за разлика од времето од самото формирање, има изменета мисија и задача и претставува еден од столбовите во безбедносниот систем во Република Северна Македонија, подготвен секогаш одговорно да одговори при извршувањето на доверените задачи, цели и обврски.
Баталјонот на Воена полиција, денес се наоѓа во формацискиот состав на Командата за операции на Армијата, сочинет со професионален состав со целосна трансформирана структура, како таков компатибилен го поседува степенот на обученост кој овозможува рамо до рамо со единиците на земјите членки на НАТО да одговори на поставените задачи, цели и обврски.
Намената на Баталјонот на Воена полиција е извршување на воено-полициски задачи на целата територија на Република Северна Македонија и на мировните операции, обезбедување на објекти од витално значење, заштита и обезбедување на воениот персонал, воени делегации и високи воени раководители од земјата и странство, откривање и спречување на казнени дела во одбраната, одржување на ред и дисциплина, како и контрола и регулирање на воениот сообраќај.
Темно сината баретка и белиот колан се обележјето со кое се разликува Баталјонот на Воена полиција од другите единици на Армијата, а со мотото „SEMPER PARATUS“ се покажува и потврдува дека за да се биде припадник на Баталјонот на Воена полиција, место има само за оние кои можат да ги исполнат високите професионални стандарди, високиот степен на одговорност, храброст, интегритет, пожртвуваност и лојалност.
Обуката на припадниците на Баталјонот на Воена полиција е разновидна, по НАТО стандарди окарактеризирана со врвни психофизички способности кои овозможуваат знаење и умешност за снаоѓање во секоја ситуација, како на домашно тло така и надвор од државата.
Баталјонот на Воена полиција, активно учествуваше во мировните мисии во Ирак, Босна и Херцеговина, ИР Авганистан и Република Косово, сето тоа изведено и завршено на крајно професионален и лидерски начин.
Континуирано зема учество на голем број обуки и вежби како во државата така и надвор од неа, каде се потврдува високото ниво на професионалност и интероперабилност со партнерите од НАТО.
Баталјонот на Воена полиција активно учествува во процесите под покровителство на центрите за извонредност за воена полиција „MP COE“ во Бидгошч, Република Полска и „SP COE“ во Винченца, Република Италија, ценети и почитувани од страна на НАТО воено-полициската заедница.
Во 2016 година, Баталјонот на Воена полиција, од страна на врховниот командант на Армијата, по повод Денот на Армијата, беше одликуван со Орден за воени заслуги.
