Во касарната „Јане Сандански“ Штип со воена свеченост беа одбележани Денот на 2. механизиран пешадиски баталјон (2.мпб), „17 ти Септември“ и свечено беше отворена вежбата „Национален одговор 2019“.
На свеченоста присуствуваа Заменик на командантот на ЗОК, бригаден генерал Орце Јордев, командантот на 1.мпбр, полковник Бесник Емини, команданти на баталјони, градоначалници, директори на јавни и приватни претпријатија и претставници на цивилни организации од зоната на одговорноста на 2.мпб.
Пред стројот на единицата и присутните гости на свеченоста, пригодно обраќање имаше командантот на 2.мпб потполковник Мирче Тасев. Во својот говор тој се осврна на историскиот пат на 14-та ММНОУ (14-та Младинско македонска народно ослободителна ударна бригада) и истакна дека сме горди што ги продолжуваме борбените традиции на таа славна бригада. Силата на оваа единица доаѓа од храброста и чесноста на припадниците кои професионално и достоинствено и служат на Армијата. Поради тоа, тој истакна дека мотото на единицата секогаш било и ќе биде ЧЕСТ И СИЛА.
По повод Ден на единицата беше положено и свежо цвеќе на спомен обележјето „Македонија“ во касарната “Јане Сандански” – Штип во чест на припадниците од 2.мпб кои ги положија своите животи во конфликтот во 2001 година. Исто така на свеченоста присуствуваа и ученици од ОУ „Димитар Влахов“ – Штип, и беше реализирана презентација на оружјето и опремата со кои располага единицата. За најдобар вод беше избран првиот вод од третата механизирана пешадиска чета.
Во рамките на свеченоста се реализира и свечено отварање на вежбата „Национален одговор 2019“. На свеченото отварање беа построени дел од единиците на Армијата ангажирани на вежбата, Центарот за управување со кризи, Дирекцијата за заштита и спасување, Црвениот крст, Министерство за здравство, општинските сили за управување со кризи на град Штип и ЕВН. На свеченоста по повод вежбата, со пригоден говор се обрати заменикот командант на Здружената оперативна команда, бригаден генерал Орце Јордев, кој истакна дека вежбата е дизајнирана да ги сплоти сите институции, за доколку затреба веднаш реагираат во справување со последиците од елементарна непогода. Тој им посака добра соработка и успешна работа на сите учесници, по што ја прогласи вежбата за отворена.
ДЈ/ЧС
