Припадници на Армијата од командата за операции и други команди и единици, во НАТО Центарот за обука и оценување (NATO Join Training and Evaluation Center-JTEC), во Крцаниси, Грузија учествуваа во реализација на вежбата „Maple Arch 23“.
Вежбата која се реализираше во период од 04-15.12.2023 година, претставуваше вежба на командно место во организација на Вооружените сили на Грузија, со поддршка и менторирање од Вооружените сили на Канада. На вежбата учествуваа 277 претставници од 9 држави и тоа: Грузија, Украина, Полска, Канада, Литванија, Норвешка, Унгарија Грција и Република Северна Македонија.
Фокусот на вежбата беше даден во извежбување на штабот на литванско-полска-украинската бригада при командување и контрола на нејзините потчинети баталјони при изведување на операции за поддршка на мирот и транзиција во изведување на одбранбени операции.
Армијата на Република Северна Македонија учествуваше со шест припадници распоредени на различни позиции во раководството на вежбата, во центарот за контрола на вежбата, во тимот за менторирање и научени лекции и во штабот кој беше во улога на претпоставена команда. Исто така на вежбата имаше и наши двајца припадници кои се во составот на SEEBRIG.
На ден 15.12.2023 година, како дел од вежбата беше реализиран Ден за високи гости, на кој беше прикажана одличната соработка, тимската работа, меѓусебното разбирање и интероперабилноста на земјите членки на НАТО и земјите партнери вклучени во самата вежба.
Од Армијата на Денот за високи гости присуствуваше командантот на 1.пешадиска бригада, бригаден генерал Сашко Лафчиски, кој покрај средба со Началникот и заменик началникот на вооружените сили на Грузија, оствари средба и со директорот на Директоратот за воена обука и соработка од вооружените сили на Канада, на која што средба беше разговарано за подготовките и организацијата на наредната вежба „Maple Arch 24“, која е планирана да се реализира во декември 2024 во нашата држава.
Како дел од подготовките на планирачкиот процес за вежбата „Maple Arch 24“, во месец јануари 2024 година, во Скопје ќе се реализираа „Курс за планирачки процес за вежби“, исто така во организација на ВС на Канада, со учество на курсисти и инструктори од Армијата и од останати земји-партнери поканети и поддржани од ВС на Канада.
