На Армискиот Полигон „Криволак“ пред, државното и воено раководство и големиот број високи гости, припадниците на армиите кои учествуваат во мултинационалната вежба „Брз одговор 23„ ( Immediate response 23), презентираа комбинирани копнени активности: „Мултинационална чета во напад, подржана со воздушна и противоклопна подршка“.
Во вежбовните активности беше вклучено и роботизираното софистицирано возило т.н. “Project Origin”, кое е во пробна употреба на Армијата на САД и кое за прв пат во вежбовни услови испали противоклопна ракета од типот „Javelin“ која е дел од неговото вооружување.
Вежбата „Immediate Response 23“ е најголема мултинационална вежба оваа година во Република Северна Македонија која отпочна на 22 мај и на неа учествуваат околу 1850 припадници на армиите на 4 НАТО земји и една партнерска земја: Република Северна Македонија, Соединетите Американски Држави, Албанија, Црна Гора и како земја партнер на НАТО Косово.
На денот за високи гости присуствуваа: претседателот на Собранието на Република Северна Македонија, Талат Џафери, претседателот на Владата, Димитар Ковачевски, министерката за одбрана, Славјанка Петровска, началникот на генералштабот, генерал-потполковник Васко Ѓурчиновски, пратеници од Собранието, министри од Владата, амбасадори од земјите членки и партнери на НАТО, генерали од армијата на САД за Европа и Африка и од НАТО командите, генералите во Армијата на Република Северна Македонија, високи воени и цивилни претставници на вооружените сили и министерствата за одбрана на земјите учеснички на вежбата и НАТО, одбранбени аташеи акредитирани во земјава и други гости.
Вежбата е од особено значење за нашата Армија во однос на споделување на знаења, способности и вештини, подобрување на интероперабилноста и меѓусебна оперативна синхронизираност помеѓу армиите на НАТО и партнерските армии, низ широк спектар на речиси симултани операции, кои се изведуваат во повеќе зони, демонстрирање на обединетоста на НАТО Алијансата за безбедноста на секоја земја членка, како и потврда на можностите на „АП Криволак“ за изведување на разновиден вид на вежбовни операции и користење на разновиден вид на борбени средства и вооружување.
