Денес, 15-ти април 2015 година (среда), во касарната „Алекса Демниевски – Бауман” во Велес, се одржа свеченост по повод Денот на Командата за обука и доктрини (КОД). На свеченоста присуствуваа: Заменикот на НГШ на АРМ генерал-потполковник Насер Сејдини, Командантот на Здружената оперативна команда генерал-мајор Методија Величковски, командантот на КОД полковник Љупчо Костовски, високи претставници од МО и ГШ на АРМ, командантите на потчинетите команди и единици на ГШ на АРМ, претставници од локалната самоуправа и други високи гости.
Командантот на КОД полковник Љупчо Костовски, во своето обраќање истакна дека празникот на КОД се одбележува како ден на кој во 1992 година зачекорија првите регрути во касарните на АРМ. Тој нагласи дека оваа команда ги има достигнато стандардите на НАТО, а исполнувајќи ја основната мисија, КОД дава интензивна поддршка на колективната обука на сите команди и единици на АРМ, а потсети и на редовната обврска за реализација на индивидуалната обука во АРМ. Укажувајќи на фактот дека во составот на КОД се полигоните и вежбалиштата на АРМ, полковникот Костовски ја потенцираше нивната улога во практичните форми на обука во Армијата, но и за потребите на другите институции во државата.
Честитајќи им го празникот на припадниците на КОД, генералот Сејдини подвлече дека КОД ја има одговорноста за реализација на обука кон сите команди и единици на АРМ, што претставува императив на оваа команда од нејзиното формирање до денес, при што укажа на процесот на трансформација кој за КОД значеше унапредување на стандардите во доменот на обуката, што придонесе за полесно достигнување на стандардите на НАТО.
На свеченоста, по повод денот КОД, беа прочитани стимулативни мерки за припадниците на командата, а беше изведена и пригодна културно-уметничка програма со учество на ученици и уметници од Велес.
Основна мисија на КОД е да ја организира, координира и реализира индивидуалната обука за војниците, питомците, подофицерите и офицерите од активниот и резервниот состав на АРМ, како и поддршка на колективната обука на командите и единиците на АРМ и развој на Доктрините и научените лекции.
