Во касарната „Јане Сандански“ во Штип со постројување на 2. пешадиски баталјон од составот на 1. пешадиска бригада од Командата за операции (КО) официјално започна и обуката на декларираната единица на Армијата во базенот на сили на НАТО.
Пред присутните свое обраќање имаше командантот на Командата за операции, генерал-мајор Павле Арсоски кој честитајки ги новогодишните празници нагласи дека со денешниов ден официјално започнува обуката на Лесниот пешадиски баталјон, која ќе биде реализирана во фази со отпочнување на обука за поединец и нејзино завршување со цела единица како целина. Успешното совладување на предвидените планирани содржини кои ќе се реализираат во текот на годината, целокупниот труд и ангажирање ќе бидат реално следени и вреднувани и зависат од секој поединец на единицата.
Краткиот временски период од една година, за совладување на содржините од планот за обуката ќе биде предизвик за кој командантот на КО изрази длабоко уверување дека ќе биде совладан.
По имплементирањето на формациските елементи минатата година, единицата отпочнува со реализација на подготовките за учество на една од најголемите меѓународни вежби планирани на македонско тло, вежбата „Одлучен удар 21“ како и подготовките за НАТО оценување на единицата по CREVEL (Combat Readiness Evalution) во 2022 година.
