Во периодот од 18-24 Април 2016 година, на армискиот полигон Криволак, се реализира заедничка обука на извидувачките единици од 1. механизирана пешадиска бригада (1.мпбр) и едно извидувачко одделение од првиот баталјон на Кралскиот Ирски Полк на Британската Армија.
За време на обуката припадниците н двете армии ги презентираа своите вештини во извршувањето на основните и напредните извидувачки задачи. На Армискиот полигон Криволак се извежбуваа тактиките, техниките и процедурите на маскирање, тактичко движење и навигација, набљудување и патролирање и остварување и прекин на борбен контакт со непријателски единици.
Тежиштето на обуката беше во изработката и функционирањето на набљудувачници на бојното поле од страна на извидувачките одделенија на партнерските армии.
Самата обука, како форум за споделување на искуства, претставуваше мост за сплотување на двете армии. За истото сведочат цврстите пријателства помеѓу војниците на Армијата на Република Македонија и Британската Армија, како гарант за искреното и взаемно помагање при заедничкото делување на идните бојни полиња, рамо до рамо, пријател до пријател.
